FAQs

Recibín un correo avisando duns filtros sospeitosos

Se lle enviamos un correo indicando que algunha das súas contas ten un filtro de correo sospeitoso, significa que o noso sistema de vixilancia detectou o que probablemente é o inicio dun ataque avanzado de interceptación de correo.

Este tipo de ataque consiste en vixiar un buzón de correo, controlando os fluxos comerciais dunha persoa ou, con maior frecuencia, dunha empresa. Cando se detecta que chega unha factura ao buzón, elimínase a mensaxe orixinal e substitúese por unha factura idéntica en formato pero cambiando o número de conta de pago cara a unha conta controlada polo atacante. O receptor, sen ser consciente do cambio, efectúa o pago á conta dos atacantes. Só se entera do problema cando, pasados uns días ou semanas, o provedor lle reclama o pago.

Como é posible que monitoricen o meu buzón de correo?

Na maioría dos casos, o contrasinal do usuario filtrouse en internet, ben porque o seu ordenador está infectado cun software de captura de contrasinais ou porque utilizou a mesma clave nun sitio web vulnerable.

Que debo facer se recibo este aviso?

Primeiro: revisar todos os ordenadores desde os que se acceda ao correo, pasando un antivirus recente.

Segundo: se se están tramitando facturas e pagos, comprobar co resto de clientes e provedores implicados que o número de conta é o correcto.

Terceiro: establecer un contrasinal seguro para o correo electrónico e non usalo en ningún outro servizo ou páxina web.

Considere activar a autenticación en dous factores no webmail.

Se pode, asegúrese de enviar as súas facturas asinadas electronicamente. Informe aos seus clientes de que todas as súas facturas se asinan electronicamente e de que deben descartar calquera factura non asinada. Verifique que todas as facturas recibidas están asinadas electronicamente e solicite aos seus provedores que asinen as súas facturas. Se algún provedor non pode asinar as facturas, non envíe transferencias a ningunha conta que non comprobou por un método alternativo.

Teña en conta que tanto o seu buzón como o do seu provedor ou cliente poden estar comprometidos. Asegúrese de que calquera información financeira se confirma sempre telefonicamente ou mediante unha sinatura electrónica.

Recomendacións sobre os contrasinais

Os contrasinais son a súa principal forma de asegurar a súa información, correo electrónico e traballo dixital. Por iso é moi importante seguir unhas regras básicas:

1) Utilice contrasinais que non sexan obvios.

2) Use contrasinais fáciles de recordar para vostede.

3) Use contrasinais longos: o ideal é formar o contrasinal a partir de varias palabras encadeadas.

4) NUNCA reutilice un contrasinal importante en dous sitios distintos (por exemplo, no seu correo electrónico e no seu acceso a Facebook). Exportar o contrasinal é o principal método de filtración.

5) Recomendamos que utilice un xestor de contrasinais para non ter que recordar varias decenas de claves distintas.